অসমৰ অৰ্থনৈতিক আকাশত এতিয়া দুটা ডাঙৰ খবৰ
এটা হ’ল জাগীৰোডত টাটা গ্ৰুপৰ বিশাল ছেমিকণ্ডাক্টৰ প্ৰকল্প আৰু আনটো হ’ল গুৱাহাটীৰ পৰিৱৰ্তিত ৰূপ অৰ্থাৎ ‘স্মাৰ্ট চিটী’ অভিযান। কিন্তু এই উন্নয়নে আমাৰ সমাজত কেনে প্ৰভাৱ পেলাব? আহক ‘নিউজ ক’ড’ৰ এই বিশেষ প্ৰতিবেদনত ইয়াৰ ভাল আৰু বেয়া দুয়োটা দিশ বিচাৰ কৰোঁ।
জাগীৰোডত ‘ছিলিকন ভেলী’: সপোন নে প্ৰত্যাহ্বান?
বন্ধ হৈ যোৱা নগাঁও কাগজ কলৰ ভূমিত এতিয়া ২৭,০০০ কোটি টকাৰ বিনিয়োগেৰে নিৰ্মাণ হ’ব ছেমিকণ্ডাক্টৰ প্ৰকল্প।
কি লাভ হ’ব?
কৰ্মসংস্থাপনৰ জোৱাৰ: প্ৰায় ২৭,০০০ যুৱক-যুৱতীয়ে পোনপটীয়া আৰু পৰোক্ষভাৱে নিয়োগ লাভ কৰিব। অসমৰ মেধাৱী ছাত্ৰ-ছাত্ৰী আৰু কামৰ সন্ধানত বহিঃৰাজ্যলৈ যাব নালাগে। অৰ্থনৈতিক পৰিৱৰ্তন: কেৱল চাহ আৰু তেলতে সীমাবদ্ধ নাথাকি অসম এতিয়া বিশ্বৰ হাই-টেক মেপত স্থান পাব।
প্ৰত্যাহ্বান ক’ত?
পৰিৱেশৰ চিন্তা: চিপ নিৰ্মাণৰ বাবে প্ৰচুৰ পানীৰ প্ৰয়োজন হয় আৰু ইয়াৰ পৰা নিৰ্গত আৱৰ্জনাই পৰিৱেশৰ ক্ষতি কৰাৰ সম্ভাৱনা থাকে।
দক্ষতাৰ নাটনি: আমাৰ থলুৱা যুৱক-যুৱতীসকল এই বিশেষ কামটোৰ বাবে কিমান প্ৰশিক্ষিত, সেয়া এক ডাঙৰ প্ৰশ্ন।
গুৱাহাটী স্মাৰ্ট চিটী: চিকমিকনিৰ আঁৰৰ সত্যমহানগৰীৰ ৰাস্তাত এতিয়া নতুন বৈদ্যুতিক বাছৰ ভিৰ আৰু ব্ৰহ্মপুত্ৰৰ পাৰত সৌন্দৰ্য্যবৰ্ধনৰ কাম চলিছে।
কি ভাল হৈছে? পৰিবহনৰ আধুনিকীকৰণ: ৪০০ ৰো অধিক বৈদ্যুতিক বাছে চহৰখনৰ প্ৰদূষণ হ্ৰাস কৰিছে আৰু যাতায়ত সহজ কৰি তুলিছে।ডিজিটেল শাসন: স্মাৰ্ট ষ্ট্ৰীট লাইট আৰু চিচিটিভি কেমেৰাই চহৰখন অধিক সুৰক্ষিত কৰি তুলিছে।
সমস্যা ক’ত ৰৈ গ’ল?
কৃত্ৰিম বানপানী: স্মাৰ্ট চিটীৰ কোটি কোটি টকা ব্যয় কৰাৰ পিছতো গুৱাহাটীৰ কৃত্ৰিম বানপানীৰ সমস্যা সমাধান হোৱা নাই। ৰাস্তাৰ সৌন্দৰ্য্যতকৈ নলা-নৰ্দমাৰ বৈজ্ঞানিক ব্যৱস্থাপনাহে বেছি জৰুৰী আছিল বুলি একাংশই মত পোষণ কৰে।অসংলগ্ন উন্নয়ন: চহৰৰ এটা অংশ চিকচিকিয়া হৈছে যদিও আন বহুতো অঞ্চল আজিও মৌলিক সুবিধাৰ পৰা বঞ্চিত।
আমাক কি লাগে?
অসমলৈ উদ্যোগ অহাটো নিশ্চিতভাৱে শুভ লক্ষণ। কিন্তু এই উন্নয়ন যাতে কেৱল কাগজে-কলমে বা বিজ্ঞাপনতে সীমাবদ্ধ নাথাকে, তাৰ বাবে আমি সচেতন হোৱা উচিত। জাগীৰোডৰ প্ৰকল্পই যাতে আমাৰ পৰিৱেশ ধ্বংস নকৰে আৰু ‘স্মাৰ্ট চিটী’য়ে যাতে কেৱল লাইটৰ চিকমিকনি নিদি আমাক বানপানীৰ পৰা মুক্তি দিয়ে— এয়াই আজিৰ সময়ৰ দাবী।