আজি গুৱাহাটীত উপস্থিত কেন্দ্ৰীয় গৃহমন্ত্ৰী অমিত শ্বাহ। প্ৰথমবাৰৰ বাবে উত্তৰ-পূৰ্বাঞ্চলত, বিশেষকৈ অসমৰ বুকুত আয়োজিত হৈছে চেণ্ট্ৰেল ৰিজাৰ্ভ পুলিচ ফৰ্চ (CRPF) ৰ বাৰ্ষিক প্ৰতিষ্ঠা দিৱসৰ পেৰেড, য’ত মুখ্য অতিথি হিচাপে অংশগ্ৰহণ কৰিছে গৃহমন্ত্ৰীগৰাকীয়ে।
আজি পুৱা গুৱাহাটীৰ অৰ্জুন ভোগেশ্বৰ বৰুৱা ষ্টেডিয়ামত অনুষ্ঠিত ৮৭ সংখ্যক চি আৰ পি এফৰ প্ৰতিষ্ঠা দিৱসৰ পেৰেডত তেওঁ উপস্থিত থাকে। এই পেৰেডত প্ৰায় ১,৪০০ চি আৰ পি এফ জোৱানে ৮ টা বেলেগ বেলেগ দলত ভাগ লৈ বাহিনীটোৰ অপাৰেচনেল শক্তি আৰু সাজু অৱস্থাৰ নিদৰ্শন দাঙি ধৰে।
অনুষ্ঠানত ভাষণ প্ৰদান কৰি গৃহমন্ত্ৰী অমিত শ্বাহে কয় যে, এদিন অস্থিৰ বুলি গণ্য কৰা উত্তৰ-পূৰ্বাঞ্চলত আজি শান্তি আৰু সুস্থিৰতা ঘূৰি আহিছে। তেওঁ এই পৰিৱৰ্তনৰ বাবে চি আৰ পি এফ আৰু অন্যান্য নিৰাপত্তাৰক্ষী বাহিনীৰ লগতে চৰকাৰৰ ধাৰাবাহিক প্ৰচেষ্টাক কৃতিত্ব দিয়ে।
ইয়াৰ উপৰিও, আজি বিয়লি গৃহমন্ত্ৰীগৰাকীয়ে গুৱাহাটীৰ সমীপৱৰ্তী সোণাপুৰৰ কচুতোলীত ১০ম অসম আৰক্ষী বেটেলিয়নৰ নতুন চৌহদৰ আধাৰশিলা স্থাপন কৰিব। বৰ্তমান গুৱাহাটীৰ পৰা কাৰ্যনিৰ্বাহ কৰি থকা এই বেটেলিয়নটো নিৰ্মাণকাৰ্য সম্পূৰ্ণ হোৱাৰ পিছত নতুন চৌহদলৈ স্থানান্তৰ কৰা হ’ব।
প্ৰথমবাৰৰ বাবে অসমত চি আৰ পি এফৰ প্ৰতিষ্ঠা দিৱস আয়োজন কৰাটোৱে ৰাষ্ট্ৰীয় নিৰাপত্তাৰ ক্ষেত্ৰত উত্তৰ-পূবৰ বৰ্ধিত গুৰুত্বকে প্ৰতিফলিত কৰিছে।