মহাৰাষ্ট্ৰৰ নগৰ নিগম নিৰ্বাচনত NDA দলৰ লগত থাকিলেও বিজেপিৰ বিৰুদ্ধে আক্রমণাত্মক স্থিতি লৈছে অজিত পাৱাৰ
বিমান দুৰ্ঘটনাত মহাৰাষ্ট্ৰৰ উপ-মুখ্যমন্ত্ৰী অজিত পাৱাৰৰ মৃত্যুৱে সমগ্ৰ ৰাজ্যখনত শোকৰ ছাঁ পেলাইছে । দুৰ্ঘটনাটো ইমানে ভয়ংকৰ আছিল যে বিমানখন বিস্ফোৰণ হৈ গৈছিল আৰু য’তে ত’তে পৰি ৰৈছিল মৃতদেহৰ অংশ । যাৰ ফলত মৃতদেহ চিনাক্তকৰণত সমস্যাৰ সৃষ্টি হৈছিল । কিন্তু সমগ্ৰ দেশতে উপ-মুখ্যমন্ত্ৰী অজিত পাৱাৰক এক সুকীয়া পৰিচয় দিয়া নেশ্যনেলিষ্ট কংগ্ৰেছ পাৰ্টীৰ ঘড়ীৰ চিহ্নই শেষত তেওঁৰ মৃতদেহ চিনাক্তকৰণত সহায় কৰিলে । যাৰ বাবে বহু অনুৰাগীয়ে কৈছে যে ঘড়ীটোৱে দাদাক তেওঁৰ পৰিচয় দিছিল আৰু ঘড়ীটোৱেই দাদাৰ মৃতদেহ চিনাক্ত কৰাত সহায় কৰিছিল ।
উল্লেখ্য যে বুধবাৰে পুৱা বিমান দুৰ্ঘটনাত প্ৰাণ হেৰুওৱা অজিত পাৱাৰৰ লগতে আন লোকৰ মৃতদেহ চিনাক্তকৰণত এক বৃহৎ প্ৰত্যাহ্বানৰ সৃষ্টি হৈছিল । অৱশ্যে অজিত পাৱাৰে পিন্ধি আছিল ৰয়েল অক ব্ৰেণ্ডৰ এটা ঘড়ী । এই প্ৰিমিয়াম ঘড়ীটোৱে তেওঁৰ মৃতদেহ চিনাক্ত কৰাত সহায় কৰিছিল ।
দুৰ্ঘটনা সংঘটিত হোৱাৰ পিছত বিমানখনত থকা মৃতদেহবোৰৰ অংশ ছেদেলি-ভেদেলি হৈ পৰি আছিল । এনে পৰিস্থিতিত সোণৰ অলংকাৰ আৰু ঘড়ীৰ দৰে ব্যক্তিগত সামগ্ৰীয়ে চিনাক্তকৰণত সহায় কৰে । চৰকাৰী নিয়ম অনুসৰি এইবোৰ আইনগতভাৱে চিনাক্তকৰণৰ উদ্দেশ্যে ব্যৱহাৰ কৰা হয় । সেয়েহে তেওঁৰ অনুৰাগীসকলে বিৰল আৰু দুৰ্ভাগ্যজনক পৰিস্থিতিৰ সন্মুখীন হৈছে য’ত অজিত পাৱাৰক পৰিচয় দিয়া একেটা ঘড়ীৰ চিহ্নই তেওঁৰ শৰীৰটোও চিনাক্ত কৰাত সহায় কৰিছিল ।
অজিত পাৱাৰৰ আৰম্ভণিৰে পৰা ঘড়ীৰ প্ৰতি দুৰ্বলতা আছিল । তেওঁৰ আছিল ৰলেক্স আৰু অন্যান্য মূল্যৱান ঘড়ী । তেওঁৰ দলৰ চিহ্নটোও ঘড়ী । কংগ্ৰেছ দলৰ পৰা আঁতৰি অহাৰ পিছত তেওঁ গোটেই জীৱন ঘড়ীৰ চিহ্নটোৰ বাবে অক্লান্তভাৱে কাম কৰিছিল । তেওঁ দলটোক গঢ় দিছিল আৰু শাৰদ পাৱাৰৰ ফৈদৰ সৈতে বিভাজনৰ পিছতো ঘড়ীৰ চিহ্নৰ প্ৰচাৰ চলাই গৈছিল । জিলা পৰিষদ আৰু পঞ্চায়তৰ নিৰ্বাচনৰ বাবে বাৰামতীত ৪ খন ৰেলীৰ জৰিয়তে পুনেত প্ৰচাৰ চলোৱাৰ কথা আছিল । কিন্তু বাৰামতী পোৱাৰ পূৰ্বেই তেওঁ এই সংসাৰৰ পৰা বিদায় ল’লে ।