ডেলিভাৰীৰ আশ্বাস দিয়া এপক লৈ চিন্তিত হৈছে চৰকাৰ। বৃহৎ সালসলনিৰ লক্ষ্য

আপুনি অৰ্ডাৰ দিয়াৰ মাত্ৰ ১০ মিনিটৰ ভিতৰতেই আপোনাৰ হাতত পৰে খাদ্য় সামগ্ৰী । মাত্ৰ আপুনি ম’বাইলত অৰ্ডাৰ দিলেই হ’ল । ইমান দিনে এই ব্য়ৱসায় ৰমৰমীয়াভাৱেই চলি আছিল । এতিয়া ১০ মিনিটৰ ভিতৰত ডেলিভাৰীৰ আশ্বাস দিয়া এপক লৈ চিন্তিত হৈছে চৰকাৰ ।এই এপসমূহৰ ফলত এজেণ্টসকলৰ অসংখ্য দুৰ্ঘটনা সংঘটিত হোৱাৰ লগতে যথেষ্ট লোকচানো হৈছে । সেয়েহে চৰকাৰে ব্লিংকিট, জেপ্ট’, জমেটো, ছুইগিকে ধৰি সকলো ডাঙৰ অনলাইন প্লেটফৰ্মকে এনে বিজ্ঞাপন আঁতৰাবলৈ নিৰ্দেশ দিছে ।কেন্দ্ৰীয় চৰকাৰৰ প্ৰতিনিধিয়ে এই অনলাইন প্লেটফৰ্মৰ প্ৰতিনিধিৰ সৈতে বিষয়টো সন্দৰ্ভত আলোচনা কৰিছে আৰু তেওঁলোকেও সন্মতি প্ৰদান কৰিছে । ব্লিংকিটে চৰকাৰক আশ্বাস দিছে যে তেওঁলোকে নিজৰ প্লেটফৰ্মত এনে কোনো বিজ্ঞাপনৰ অনুমতি নিদিয়ে । আন প্লেটফৰ্মসমূহেও ইয়াৰ অনুসৰণ কৰিব বুলি আশা কৰা হৈছে । শ্ৰমমন্ত্ৰী মনসুখ মাণ্ডাভিয়াই এই বিষয়ত দ্ৰুত বাণিজ্যখণ্ডত কাম কৰা কোম্পানীসমূহৰ সৈতে আলোচনা কৰিছে ।এই সন্দৰ্ভত লেখক, স্তম্ভলেখক, স্বদেশী জাগৰণ মঞ্চৰ ৰাষ্ট্ৰীয় সহযোগী আহ্বায়ক অশ্বিনী মহাজনে ইটিভি ভাৰতক কয় যে পূৰ্বৰ ধৰ্মঘটৰ পিছত আৰু সুৰক্ষাৰ চিন্তাত এই বিষয়টোত দীৰ্ঘদিন ধৰি আলোচনা চলি আছে ।মহাজনে কয়, “অতি কটকটীয়া ডেলিভাৰীৰ সময়সীমাৰ বাবেই দুৰ্ঘটনা সংঘটিত হোৱাৰ আশংকা বৃদ্ধি কৰে আৰু যুৱ শ্ৰমিকৰ জীৱন বিপদত পেলায় । কোনো কামেই ইমান জৰুৰী নহয় যে ই কেইমিনিটমান অপেক্ষা কৰিব নোৱাৰে । যদিও বিশ্বজুৰি হাইপাৰ-ফাষ্ট ডেলিভাৰীৰ মডেল আছে, সঘনাই দুৰ্ঘটনা সংঘটিত হোৱাৰ পিছতো কোম্পানীসমূহে প্ৰায়ে সীমাবদ্ধতা আৰোপ কৰিবলৈ কুণ্ঠাবোধ কৰে । ভাৰতে অন্ধভাৱে বিশ্বব্যাপী পদ্ধতিৰ নকল কৰা অনুচিত । স্থানীয় কামৰ পৰিস্থিতি ওপৰত ভিত্তি কৰি শ্ৰমিকৰ সুৰক্ষাক অগ্ৰাধিকাৰ দিয়া উচিত ।”